أقر وأعترف

أقر وأعترف

كتبها د. ماهر حبيب



أقر وأعترف بأنى ما كنتش فاهم إللى حا يحصل بعد 25 يناير والدليل هو إن حرية حرق الكنايس بقت متاحة لكل واحد يتخانق مع قبطى وبدون مضايقة أو عكننة من حد .
أقر وأعترف بإنى كنت غلطان لما كنت زعلان على دبح القسيس لأن حرية قتل المواطن القبطى بعد الثورة لازم تكون متاحة لكل واحد لأن الزعل ده معناه الحجر على حرية المواطن فى أنه يعمل إللى هو عاوزه وده ما كانش فى خطة الثورة.

أقر وأعترف بأنى ما هضمتش تعيين وزير الثقافة الجديد إللى أعلن بكل حرية وقال وفيها أيه الدولة الدينية لا هى عيب ولا حرام وطبعا إذا كان الراجل بتاع الثقافة بيقول كده يبقى برضه من الوزير للغفير لازم يأيدوا الدولة الدينية وعلى الأقباط يخبطوا دماغهم فى أقرب حيط لكن الصراحة الراجل واضح وصريح وبدل اللف والدوران هو قالها بصرحة فى وشنا.

أقر وأعترف بأنى كنت فاهم غلط إن ليه رئيس الوزرا شرف كان واقف فى ميدان التحرير جانبه الشاطر إللى لسه خارج من السجن لكن قعدت حسبتها ولقيت إن رئيس الوزرا عاوز رأس مال طاهر وشريف والشاطر رجل أعمال شرعى فكل فلوسه حلال أما باقى رجال الأعمال الفاسدين والكافرين فمصيرهم التعليق فى المشانق أما الشاطر فسيكون وزير بيت المال الإسلامى إللى حا يحل محل وزارة المالية الكافرة.

أقر وأعترف بأنى كنت غلطان فى حق الحاج محمد حسين بركة وإنى ما كنتش عارف نيته الحقيقية وهى فتح شارع إسلامى يمتد من غزة شرقا حتى تونس الخضرا بلون علم الإخوان غربا يكون بداية إقامة الخلافة ويرجع الشيخ أسامة والشيخ الظواهرى ليقصوا الشريط مع الحاج حسين وبكده تهدا أفغانستان وتقدر أمريكا تمشى من هناك بعد ما تتحول الدول الخمسة حماس ومصر وشمال السودان وولايات ليبيا الإسلامية بعد سقوط القذافى وتونس مع حركة النهضة شريكة إخوان طظ فى مصر إلى نواة الخلافة وما يحتاجش مجاهدى القاعدة لجبال تورا بورا وبدل البهدلة يرجعوا معززين مكرمين ويمكن يبقوا وزرا ودليلى على كده إعلان إدارة الحاج حسين إن أمريكا ما عندهاش مانع من قيام حكومات إسلامية لو كانت ديموقراطية وسلم لى على ديموقراطية طظ.

أقر وأعترف بأنى كنت مش فاهم نظرية إالغاء الشرطة وليس إصلاحها لأن وجود شرطة كويسة أو وحشة حا يمنع البلطجة فى الشارع وإحنا إتعودنا اليومين دول على البلطجة وبقت حاجة مسلية جدا لما تقف فى البلكونة وإنت زهقان علشان مفيش لا شغلة ولا مشغلة وبعدين تلاقى ناس بتكسر عربية فى وسط الشارع أو بتشرح واحد بمطوا فتصور الحادثة على الموبيل وتنشرها على اليوتيوب ويمكن الفيديو يعجب أوبرا وينفرى وتستضيفك فى برنامج أوبرا أو دكتور فل وتبقى أشهر من نار على علم بدل البطالة إاللى إنت فيها.

أقر وأعترف إنى كنت غلطان لما كنت فاكر إن إحنا ممكن نحافظ على إى حاجة إتعملت فى العهد البائد لكن لازم نقدم بلاغات للنائب العام على كل حاجة وأى كوبرى أو مترو أنفاق إتعمل لازم نهده لأن أكيد إللى عملوه كان فيه ناس فاسدين وإحنا لازم نجيب البلد على الأرض ونبنيها من جديد على نضافة وعلى الطراز الإسلامى وطبعا لازم نهد محطة رمسيس لمترو الأنفاق علشان اليافطة إللى موجودة على المحطة بأسم الرئيس السابق.

أقر وأعترف بأنى حسبتها غلط لما كنت فاكر سرقة الأثار حاجة وحشة لكن الغرض من السرقة هو المحافظة على الأثار سليمة بعد ما يبيعها الحرامية لناس بتفهم فى الأثار وإللى بدورها حا توديها لناس بتحافظ على الأثار وإتخيلوا معايا لو قناع توت الذهبى راح جنب راس نفرتيتى فى ألمانيا ممكن يخلفوا لنا قناع دهبى أجمل من توت ونفر مع بعض

إقر وأعترف بأنى زعلان على الدورى إللى إتلغى يعنى لما الزمالك يبقى أول الدورى وحا ياخد الدورى السنة دى يروح الدورى فى الكازوزة صحيح قليل البخت يطلع له العضم فى الكرشة